أسئلة وأجوبة
1. واش كنتي عارف بلي المغرب كيدعم صناعة الألعاب الإلكترونية؟
برنامج دعم صناعة الألعاب الإلكترونية هو برنامج تطلق فإطار صندوق دعم الابتكار التابع لوزارة الصناعة والتجارة بشراكة مع وزارة الشباب والثقافة والتواصل. الهدف ديالو هو تقديم دعم مالي للمشاريع فمجال صناعة الألعاب الإلكترونية اللي كتنّجزها المقاولات الصغرى، المقاولات جد الصغرى والمتوسطة، والشركات الناشئة المغربية. وكيشمل هاد البرنامج مراحل مختلفة كاتبدا من تطوير النموذج الأولي وكتوصل حتى لإنتاج نسخة تجريبية واجدة باش تعرض فالسوق.
2. شكون كيساهم فتنفيذ ودعم هاد البرنامج؟
هاد البرنامج ناتج عن شراكة بين 5 ديال الجهات: وزارة الشباب والثقافة والتواصل، وزارة الصناعة والتجارة، وزارة الاقتصاد والمالية، «Maroc PME»، والاتحاد العام لمقاولات المغرب (CGEM).
3. علاش برنامج دعم صناعة الألعاب الإلكترونية؟
باش يساهم فتنمية هاد الصناعة فالمغرب من خلال تقديم دعم مالي للأستوديوهات المغربية. والهدف الأساسي ديالوهو يساعد فحل مشكل التمويل اللي كيبقى من بين أكبر العوائق لي كايواجهوها المطورين المغاربة باش يصوبوا ويخرجوا ألعاب إلكترونية جديدة ومبتكرة. وكيسعى البرنامج أيضا باش يشجع على ظهور مشاريع عندها إمكانيات كبيرة ويساهم فتقوية وتطوير صناعة الألعاب الإلكترونية فالمغرب ويخليها أكثر قدرة على المنافسة.
4. واش عندك فكرة على شحال كيتخصص لهاد البرنامج كل عام؟
هاد البرنامج مخصص ليه 50 مليون درهم كل عام لمدة 3 سنين متابعة: 2026، 2027 و2028. يعني فالمجموع، غتوصل الميزانية لـ 150 مليون درهم.
5. شنو أنواع الدعم اللي كيقدّم هاد البرنامج للمستفيدين؟
كاينين جوج أنواع ديال الدعم، ويمكن ليكم تدفعو ليهوم بجوج فـنفس الوقت:
- دعم النموذج الأولي: كايغطي 70% من المصاريف (بلا احتساب الرسوم) وبسقف كيوصل حتى لمليون درهم. هاد الدعم كيساعدكم تطورو وتجربو أول نسخة من اللعبة ديالكم.
- دعم التصنيع والإنتاج: كايغطي 30% من المصاريف (بلا احتساب الرسوم) وبسقف كيوصل حتى لـ 3 مليون درهم. هاد الدعم كيساعدكم باش تحولوا النموذج الأولي لمنتج حقيقي واجد باش يخرج للسوق.
6. واش كنتي عارف شحال من مشروع يقدر يستافد من الدعم كل عام؟
كل عام، 20 مشروع يقدرو يستافدو من المواكبة والتمويل على مدى 3 سنين: 2026، 2027 و2028.
7. واش كنتي عارف شكون لي يقدر يدفع لهاد الدعم؟
هادو هما الفئات اللي يقدرو يترشحو لهاد البرنامج:
- المقاولات المغربية الصغيرة جداً، والصغرى والمتوسطة، اللي ما كيتجاوزش رقم معاملاتها السنوي 200 مليون درهم، (بدون احتساب الضريبة) خلال آخر جوج سنوات مالية.
- الشركات الناشئة اللي خدامة فمجال صناعة الألعاب الإلكترونية واللي عندها قابلية كبيرة للنمو.
وكاينين حتى بعض الشروط:
- الأشخاص الذاتيون والمقاولون الذاتيون ما يقدروش يترشحو.
- وأي مساهم فشركة كيتجاوز رقم المعاملات ديالو 200 مليون درهم، ما خاصوش يملك أكثر من 20% من رأسمال الشركة المترشحة.
- وما يمكنش لمؤسسة عمومية أو مقاولة عمومية تكون شريك أو مساهم فالشركة المترشحة.
8. شنو هي المصاريف اللي يقدر يغطيها هاد الدعم؟
المصاريف اللي يقدر يغطيها الدعم كتختلف حسب النوع:
– العرض الأول : دعم تطوير النموذج الأولي
كيشمل مصاريف:
- تطوير النموذج الأولي ديال اللعبة الإلكترونية
- اختبار اللعبة الإلكترونية مع المستخدمين والتأكد من الجودة ديالها
- اقتناء الأدوات والرخص اللي خاصين لتطوير اللعبة الإلكترونية
- الاستعانة بخبرة تقنية
– العرض الثاني : دعم التصنيع وإطلاق النسخة الأولية
كيشمل مصاريف:
- اقتناء المعدات والمنصات اللازمة
- أنظمة التسيير وتتبع الجودة
- الترويج للعبة الإلكترونية وإطلاقها فالسوق
معلومة مهمة : بالنسبة لمشاريع سنة 2026، المصاريف المؤهلة للاستفادة من الدعم كتحسب ابتداءً من 1 يناير 2026.
المصاريف اللي كتكون بين شركات عندها نفس المساهم، كلياً أو جزئياً، ما كتكونش مؤهلة للاستفادة من الدعم.
9. فوقاش تقدر تقدم الطلب ديالك باش تستافد من هاد الدعم؟
بالنسبة لسنة 2026، آخر أجل باش تقدّم الطلب ديالك هو 15 أكتوبر 2026، والمصاريف اللي غادي تستافد منها كيتحسبو ابتداءً من 1 يناير 2026.
10. شنو خاص يكون فملف الطلب ديالك باش تستافد من هاد الدعم؟
الملف ديال الطلب كيتكوّن من جوج أجزاء:
- الملف الإداري:
- نسخة من النظام المتعلق بطلب تقديم المشاريع، مؤشرة ومختومة وموقعة.
- مستخرج من السجل التجاري، نموذج J، ما يكونش فات عليه 3 شهور.
- نسخة مصادق عليها من القانون الأساسي للشركة ما فاتش عليها 3 أشهر.
- شهادة جبائية خاصة بالصفقات العمومية، صالحة لمدة عام.
- شهادة CNSS صالحة لمدة عام.
- شهادة رقم المعاملات أو مخطط الأعمال (Business Plan) ديال 5 سنين.
- تصريح بالشرف وطلب التمويل.
- شهادة الحساب البنكي RIB، والحساب خاصو يكون مفتوح لدى الخزينة العامة للمملكة TGR.
- الملف التقني:
- استمارة الترشيح.
- تعريف بالشركة وشرح المشروع.
- السيرة الذاتية ديال رئيس المشروع وأعضاء الفريق، موقعة ومختومة.
- اتفاقيات الشراكة أو التعاون.
- العقد، السيرة الذاتية ديال الخبراء وتفاصيل الخدمات اللي غادي يقدموها.
- خطة العمل والجدول الزمني لإنجاز المشروع.
- برنامج تقديري للمصاريف، حسب النموذج المقدم.
- نسخة إلكترونية كاملة من الملف على مفتاح USB.
11. واش كنتي عارف كيفاش كاتكون عملية إختيار المشاريع؟
من بعد ما كتقدم الطلب ديالك، عملية اختيار المشاريع كتدوزمن 4 ديال المراحل:
- الانتقاء الأولي
وزارة الصناعة والتجارة ووزارة الشباب والثقافة والتواصل كيراجعو الملف ديالك وكيشوفو واش جميع الوثائق المطلوبة موجودة. إلا كانت شي وثيقة ناقصة، كيطلبو منك تكمل الملف ديالك
- التقييم
من بعد، لجنة تقنية كتقيّم المشروع ديالك اعتماداً على مجموعة ديال المعايير، بحال التجربة والمؤهلات ديالك، جودة وتماسك المشروع، شنو الجديد والابتكار اللي فيه، والتأثير الاقتصادي والقطاعي اللي ممكن يحققو. وكيتم تنظيم جلسات باش تقدم المشروع ديالك بطريقة تدريجية.
- الانتقاء النهائي
من بعد التقييم، لجنة تتبع البرنامج كتصادق على اللائحة النهائية ديال المشاريع المقبولة، وكتحدد شنو هي المصاريف اللي غادي يشملها الدعم والقيمة المالية ديالو. ومن بعد، كيوصل كل مترشح بإشعار عبر الإيميل.
- التعاقد
إلا تم قبول المشروع ديالك، كتوقع اتفاقية مع وزارة الشباب والثقافة والتواصل، ووزارة الصناعة والتجارة، ووزارة الاقتصاد والمالية، وMaroc PME، والاتحاد العام لمقاولات المغرب (CGEM).
مدة هاد الاتفاقية ما كتفوتش 24 شهر، والدعم المالي كيتصرف على 3 دفعات.
12. كيفاش كيتصرف الدعم للمستفيدين؟
كيتم صرف الدعم على 3 دفعات، على حساب التقدم ديال المشروع، وخاص المستفيد يحتافظ بجميع الوثائق اللي كاتثبت المصاريف ديالو.
– الدفعة 1 :
كيتوصل المستفيد بـ30% من مبلغ الدعم منين كيكمل على الأقل 30% من المشروع، وكيقدم شنو تدار والوثائق اللي كاتثبت المصاريف اللي خلّص.
–الدفعة 2 :
كيتوصل بـ40% من مبلغ الدعم منين كيكمل على الأقل 70% من المشروع، وكيقدم شنو تدار والوثائق اللي كاتثبت المصاريف اللي خلّص.
– الدفعة 3 : كيتوصل بـ30% اللي بقات منين كيكمل المشروع كامل، وكيقدم جميع النتائج ديال المشروع والوثائق اللي كاتثبت المصاريف.
مهم : خاص المستفيد يحتافظ بجميع الوثائق اللي كاتثبت المصاريف ديال المشروع ديالو.
13. واش كنتي عارف فين وكيفاش خاصك دفع الطلب ديالك؟
فين ندفع ملف الترشيح؟
خاصك تحط ملف الترشيح ديالك فوزارة الصناعة والتجارة، قسم المنصات التكنولوجية والأقطاب، المديرية العامة للصناعة، الحي الإداري فالرباط شالة.
كيفاش ندفع ملف الترشيح؟
خاصك توفّر نسخة إلكترونية فالـ USB وثلاثة نسخ ورقية، وتحطهم كاملين فظرف مغلق. وخاص جميع الوثائق تكون معمّرة، موقّعة ومختومة.
14. واش أجور الفريق داخلة فالمصاريف اللي يقدر يغطيها الدعم؟
لا، مصاريف الأجور والرواتب ديال الفريق ما داخلاش ضمن المصاريف اللي يقدر يغطيها الدعم.
15. واش الشراكة الاستراتيجية مع شركة مغربية كبرى شرط ضروري باش دفع لهاد البرنامج؟
لا، ماشي ضروري تكون عندك شراكة استراتيجية مع شي شركة مغربية كبيرة باش دفع لهاد البرنامج.
المهم هو تكون المقاولة ديالك كتستوفي الشروط المطلوبة سواء كانت عندها شراكة استراتيجية أو لا.